போராட்டத்தின் வடிவை மாற்றவும் தயங்க மாட்டோம் :புதுக்குடியிருப்பு பிரதேச மக்கள் விசனம்

புதுக்குடியிருப்பு பிரதேச செயலத்திற்கு முன்னால்  காணி உரிமையாளர்களால் முன்னெடுக்கப்பட்ட போராட்டத்திற்கு இன்றையதினம் கலைஞர் கழகம், விளையாட்டு கழகம், மற்றும் கிராம அபிவிருத்தி சங்கங்கள் உள்ளிட்ட பல்வேறு தரப்பினர் இன்று ஆதரவு வழங்குவதாக தெரிவித்துள்ளதாக போராட்டத்தில் ஈடுபட்டுள்ள  மக்கள் தெரிவித்துளனர்.

இபோராட்டமானது மக்களால் நான்காவது நாளாகவும் தீர்வின்றி முன்னெடுக்கப்படும் நிலையில், பிரதேச செயலகத்தை முற்றுகையிட்டு போராட்டத்தை முன்னெடுக்கப்போவதாக மக்கள் மேலும் தெரிவித்துள்ளனர்.

49 குடும்பங்களுக்கு சொந்தமான 19 ஏக்கர் காணிகளை இராணுவம் சுவீகரித்து நிலைகொண்டுள்ள நிலையில் பொதுமக்கள் தொடர்ச்சியான அகதி வாழக்கையை முன்னெடுத்துள்ளனர்.

இந்த நிலையில் கேப்பாபுலவு மக்களின் போராட்டத்திற்கு ஆதரவு தெரிவித்தும் தமது காணிகளிலிருந்து இராணுவத்தை வெளியேறுமாறு கோரியும் பொதுமக்களால் நான்காவது நாளாக போராட்டம் முன்னெடுக்கப்பட்டுள்ளது.